የፌደራል ጠቅላይ ፍርድ ቤት በአዋጅ ቁጥር 1234/2013 አንቀጽ 53 መሰረት ከቀድሞ ዳኞች፣ ከፍተኛ ልምድ እና ብቃት ካላቸው የህግ ባለሙያዎች እና ከዩኒቨርሲቲ ምሁራን ከተውጣጡ አካላት የአማካሪ ምክር ቤት የፌደራል ጠቅላይ ፍርድ ቤት ምክትል ፕሬዝደንት ክብርት ወ/ሮ አበባ እምቢአለ በተገኙበት ጥቅምት 19 ቀን 2016 ዓ.ም አቋቋመ፡፡

የፌደራል ጠቅላይ ፍርድ ቤት እና የአዲስ አበባ ከተማ አስተዳዳር ገቢዎች ቢሮ በፍርድ ቤቶች በማስረጃነት በሚቀርቡ ሠነዶች ላይ የቴምብር ቀረጥ ለማስለጠፍ እና ቀረጥ በተመን ለማስከፈል ባለጉዳዮች ክርክራቸውን በሚያቀርቡበት ምድብ ችሎቶች አቅራቢያ አገልግሎቱን ለመስጠት የሚያስችል ስምምነት ተፈራረሙ፡፡

የፌደራል ፍርድ ቤቶች በነሐሴ እና መስከረም ወራት በከፊል ዝግ ሆነው መቆየታቸውን ተከትሎ የ2016 በጀት ዓመት መደበኛ የዳኝነት አገልግሎት ለማስጀመር ጥቅምት 1 ቀን 2016 ዓ.ም በፌደራል ጠቅላይ ፍርድ ቤት የተዘጋጀ ሥነ ሥርዓት ተካሔደ፡፡ መደበኛ የዳኝነት አገልግሎት ለማስጀመር የተካሔደውን ሥነ ሥርዓት ተከትሎ የፌደራል ፍርድ ቤቶች መደበኛ የዳኝነት አገልግሎታቸውን በይፋ ጀምረዋል፡፡

በስነ-ስርዓቱ ላይ የሶስቱ የፌደራል ፍርድ ቤቶች ፕሬዝደንቶችና ምክትል ፕሬዝደንቶች እንዲሁም የፌደራል ጠቅላይ ፍርድ ቤት ዳኞችን ጨምሮ የስራ ክፍል ኃላፊዎችና ጥሪ የተደረገላቸዉ እንግዶች ታዳሚ ሆነዋል፡፡

የፌዴራል ጠቅላይ ፍርድ ቤት ከኢጋድ ጋር በመሆን ለሶስት ቀናት በሽግግር ፍትሕ የዳኞች ሚና በሚል ርዕስ በቢሾፍቱ ከተማ ሲካሄድ የቆየው ወርክሾፕ ተጠናቀቀ፡፡

ወርክሾፑን በንግግር የከፈቱት የፌዴራል ጠቅላይ ፍርድ ቤት ምክትል ፕሬዝዳንት ክብርት ወ/ሮ አበባ እምቢአለ እንደገለጹት ዳኞች አድካሚ የዳኝነት ስራ አጠናቀው በሚገኙበት በአሁኑ የእረፍት ጊዜ የዳኞችን አቅም ለማገንባት የሚያስችል፣ በሀገር አቀፍ ደረጃ ትኩረት በተሰጠው የሽግግር ፍትሕ ጉዳይ ላይ ወርክሾፕ መዘጋጀቱ በቀጣይ የሚቀርቡ የሽግግር ፍትሕ ጉዳዮች ላይ በቂ ግንዛቤ እና እወቀት በመያዝ ለመስራት የሚያግዝ መሆኑን ገልጸዋል፡፡