ሰበር ሰሚ ችሎቱ ሕጋዊነቱ ባልተረጋገጠ ሁኔታ በእስር ላይ የሚገኙት ኮሎኔል ገሙቹ አያና ከእስር እንዲለቀቁ ትዕዛዝ ሰጠ፡፡

የፌዴራል ጠቅላይ ፍርድ ቤት 3ተኛ ሰበር ሰሚ ችሎት ዛሬ ግንቦት 16 ቀን 2014 ዓ.ም በዋለው ችሎት  ከቀረበባቸው ክስ በከፍተኛ ፍርድ ቤት በነጻ ከተሰናበቱ በኋላ ህጋዊነቱ ባልተረጋገጠ ሁኔታ የተያዙና ይህ ውሳኔ እስከተሰጠበት ቀን ድረስ በእስር ላይ የሚገኙትን ኮሎኔል ገመቹ አያና ከእስር እንዲለቀቁ ወስኗል፡፡  ለፌዴራል ፖሊስም ተጠርጣሪውን በዛሬዋ ዕለት እንዲለቅ ትዕዛዝ ሰጥቷል፡፡

ሰበር ሰሚ ችሎቱ ይህን ውሳኔ ያስተላለፈው በፌዴራል ጠቅላይ አቃቤ ህግ አመልካችነት በመዝገብ ቁጥር 222914 የቀረበለትን መዝገብ መርምሮ የተጠርጣሪውን (የኮሎኔል ገመቹ አያና) አያያዝ እና እስር ሕጋዊነትን በተመለከተ የማስረዳት ሀላፊነት ያለባቸው የፌዴራልም ሆነ የኦሮሚያ ፖሊስ ኮሚሽን የአያያዛቸውን ሕጋዊነት ያላስረዱ በመሆኑ ነው፡፡

ፍርድ ቤቶች የዜጎችን ሰብአዊ መብቶች እና ነጻነቶች የማስከበር ተፈጥሮአዊ ሥልጣን ያላቸው እና ሕገመንግስታዊ ግዴታቸውም ጭምር ነው ያለው ሰበር ሰሚ ችሎቱ ይህ ሕገመንግስታዊ ግዴታም መብቱ ተጥሶብኛል የሚለው ወገን ለፍርድ ቤቱ ሲያመለክት ወይም ፍርድ ቤቱ መብቱ የተጣሰ ስለመሆኑ በየትኛውም ደረጃ ላይ ባለ ክርክር ራሱ ሲደርስበት በላቀ ሁኔታ ሊተገበር የሚገባ መሆኑን ገልጿል፡፡ ሕግ አስፈጻሚ የሆኑት ፖሊስ እና ዓቃቤሕግም ሰብአዊ መብቶችን እና ነጻነቶችን የማስከበር ሕገመንግስታዊ ግዴታ ያለባቸው በመሆኑ በከፍተኛ የሀላፊነት ስሜት መብቱን ለማስከበር ሊተጉ እና ሊያስፈጽሙ ይገባል ሲል ችሎቱ ውሳኔ በሰጠበት ሃተታው አጽነኦት ሰጥቷል፡፡   

የሰበር ሰሚ ችሎቱ የሰጠውን ውሳኔ ከታች ያለውን መስፈንጠሪያ በመጫን ከፍርድ ቤቱ ድረ-ገጽ ማግኘት ይችላሉ፡፡

https://www.fsc.gov.et/Digital-Law-Library/Judgments/Cassation-Decisions/%e1%8a%a5%e1%8a%90-%e1%8a%ae%e1%88%8e%e1%8a%94%e1%88%8d-%e1%8c%88%e1%88%98%e1%89%b9-%e1%8a%a0%e1%8b%ab%e1%8a%93-%e1%88%ae%e1%88%ae-%e1%8a%a5%e1%8a%93-%e1%8b%a8%e1%8d%8c%e1%8b%b4%e1%88%ab%e1%88%8d-%e1%8c%a0%e1%89%85%e1%88%8b%e1%8b%ad-%e1%8a%a0%e1%89%83%e1%89%a4-%e1%88%85%e1%8c%8d-%e1%8b%a8%e1%88%b0%e1%88%98%e1%89%81-222914

የፌ/ጠ/ፍ/ቤት ኮሚዩኒኬሽን ጉዳዮች ዳይሬክቶሬት