በሶማሌ ክልል መንግስት ጠቅላይ ፍርድ ቤት ፕሬዝደንት ክቡር አቶ አሊ ባሩድ የተመራ ልዑክ በፌደራል ጠቅላይ ፍርድ ቤት በመገኘት የልምድ ልውውጥ አደረገ

ልዑክ ቡድኑ በነበረው ቆይታም በፌደራል ጠቅላይ ፍርድ ቤት እየተከናወኑ ያሉ በርካታ የለውጥ ተግባራትና የቴክኖሎጂ መሰረተ ልማት አፈጻጸሞች እንዲሁም አተገባበር ምን እንደሚመስል በቀን 04/13/2017 ዓ.ም በፌደራል ጠቅላይ ፍርድ ቤት በመገኘት ምልከታ እና ውይይት አካሂዷል ፡፡   

የፌደራል ጠቅላይ ፍርድ ቤት ምክትል ፕሬዝደንት ክብርት ወ/ሮ አበባ እምቢአለ በውይይቱ ወቅት ባደረጉት ንግግር ፍርድ ቤቶች እንደ ሀገር መዳረሻቸው የቴክኖሎጂ ተጠቃሚነትን በማሳደግ ተደራሽ፣ ቀልጣፋ እና ጥራት ያለው የዳኝነት አገልግሎት መስጠት ሊሆን እንደሚገባውና ይህንንም ለማሳካት በጋራ በመሆን የልምድ ልውውጦችን እና መልካም ተሞክሮዎችን ማሳደግ እንደሚገባ ገልጸዋል፡፡

አክለውም ቴክኖሎጂን መሰረት አድርገው የሚሰሩ በርካታ የለውጥ ስራዎችን የህግ ማዕቀፍ እንዲኖራቸው መመሪያዎችን ማዘጋጀትና ህጉን መሰረት አድርጎ መፈጸም እንደሚገባ ጠቅሰዋል፡፡

በውይይቱ የፌደራል ጠቅላይ ፍርድ ቤት የኢንፎርሜሽን ኮሚዩኒኬሽን ቴክሎጂ ፕሮጀክቶች የደረሱበት ደረጃ ፣ የፍርድ ቤት መር አስማሚነት ሚና፣ የተከላካይ ጠበቆች እንዲሁም የፍርድ አፈጻጸም ጽ/ቤቶች አደረጃጀትና አሰራር እንዲሁምየበጀት ዝግጅት የማጽደቅና የአጠቃቀም ልምዶች ላይ በርካታ ሀሳቦች ተነስተው ውይይት ተደርጎባቸዋል፡፡

በመጨረሻም በፌደራል ጠቅላይ ፍርድ ቤት የሚገኘውን የስማርት ኮርት ሩም፣ የዋይድ ኤሪያ ኔትወርክ ዳታ ሴንተርና ኖክ ሩም ጉብኝት ተካሂዷል፡፡