በአገልግሎት አሰጣጥና የደንበኞች አያያዝ ላይ ሲሰጥ የቆየው ስልጠና ተጠናቀቀ

የፌደራል የህግና የፍትሕ ኢንስቲትዩት ለተከታታይ ሦስት ሳምንታት በሶስት ዙር ከፌዴራል ፍርድ ቤቶች፣ከፍትሕ ሚኒስቴር እንዲሁም ከፌዴራል የሕግና የፍትሕ ኢንስቲትዩት ለተውጣጡ 170 የአስተዳደር ሰራተኞች ከጥቅምት 21 ቀን እስከ ህዳር 6ቀን 2018 ዓ.ም በፌዴራል ጠቅላይ ፍ/ቤት ሲሰጥ የቆየው ስልጠና ተጠናቋል፡፡

ሥልጠናው በየዙሩ ለሶስት ተከታታይ ቀናት ሲሰጥ የቆየ ሲሆን ስልጠናውን የሰጡት አማካሪና አሰልጣኝ የሆኑት አቶ ዜና ቦጋለ የስልጠናው አስፈላጊነት በገለጹበት ወቅት የአስተዳደር ሰራተኞች የአገልግሎት አሰጣጥና የባለጉዳይ አያያዝ ልህቀትን (Exellence) ለማምጣትና ግንዛቤን ለማስረጽ ያለመ በመሆኑ ሰልጣኙ ቅድመ ንቃት እንዲኖረውና በአመለካከት፣በስሜትና በብልሃት ዝግጁ ሆኖ እራሱን ወደ ተሻለ ደረጃ ለማድረስ የሚረዳ እንደሆነ ገልጸዋል፡፡ በሌላ በኩልም አገልግሎት ሰጪው አካል ከደንበኞች አያያዝና ግንኙነት ጋር የሚኖረው የተግባቦት ክህሎት ከፍ እንዲልና እንዲሻሻል ያግዛል ብለዋል፡፡

በሁሉም ዙሮች የስልጠናው ማስጀመሪያና ማጠናቀቂያ ላይ የኢኒስቲትዩት ምክትል ዋና ዳይሬክተር ክቡር አቶ ዘካርያስ ኤርኮላና ሌሎች የፌደራል ጠቅላይ ፍርድ ቤት እና የኢኒስቲትዩቱ የሚመለከታቸው የስራ ሃላፊዎች ሰልጣኞች የወሰዱትን ስልጠና ወደ ተግባር የሚቀይሩበትን የስራ መመሪያ ሰጥተዋል፡፡