የፌደራል ጠቅላይ ፍርድ ቤት ሪሶርስ ኢንሪቺንግ አፍሪካን ላይቭስ በሚባል ግብረ ሰናይ ድርጅት አስተባባሪነት የተሰበሰቡ መጽሃፍቶችን ተረከበ

ሪሶርስ ኢንሪቺንግ አፍሪካን ላይቭስ በመባል የሚጠራ ግብረ ሰናይ ድርጅት ቡክስ ፎር አፍሪካና ቶምሰን ሪዉተርስ ከሚባሉ ለጋሽ ድርጅቶች ለትምህርት ቤቶች እና ለፍትህ ተቋማት የሚያገለግሉ መጻሃፍቶችን በማሰባሰብ ወደ አገር ውስጥ እንዲገባ አድርጓል፡፡

የሪሶርስ ኢንሪቺንግ አፍሪካን ላይቭስ መስራች እና ዋና ስራ አስፈጻሚ የሆኑት ወ/ሮ ጸሃይ ወዳጆ እነዚህ በድጋፍ መልክ የተገኙና 483,900 ዶላር ዋጋ ያላቸዉን መጽሃፍቶች ከለጋሽ ድርጅቶች እንዲሰበሰቡ በማድረግና ወጪያቸዉ ተሸፍኖ ወደ ኢትዮጵያ እንዲላኩ አድርገዋል፡፡ በርካታ ቁጥር ያላቸዉ መጽሃፍቶች ለትምህርት ቤቶች የተላኩ ሲሆን ለፌዴራል ጠቅላይ ፍርድ ቤት፣ ለፌዴራል ህግ እና ፍትህ ኢንስቲትዩት እንዲሁም ለኦሮሚያ ጠቅላይ ፍርድ ቤት አነስተኛ ቁጥር ያላቸዉ የህግ መጽሃፍቶች እንዲደርሳቸዉ ተደርጓል፡፡

መፅሃፍቶቹ ወደ አገር ውስጥ እንዲገቡ ሁሉንም አካላት በመወከል ሲያስተባብር የነበረው የፌዴራል ጠቅላፍ ፍርድ ቤት ሲሆን በዚሁ አጋጣሚ መጽሃፍቶች ከለጋሽ ድርጅቶች እንዲሰበሰቡ እና ወጪያቸዉ ተሸፍኖ ወደ ኢትዮጵያ እንዲላኩ ያደረጉትን ወ/ሮ ጸሃይ ወዳጆን፣ መጽሃፍቶቹ ከቀረጥ ነጻ ሆነው እንዲገቡ ባለዉ መመሪያ መሰረት ፈቃድ የሰጠው የገንዘብ ሚኒስቴር፣ የጉምሩክ እና የማጓጓዝ ሂደቶች እንዲሳለጡ ያደረጉ የጉሙሩክ ኮሚሽን እና የኢትዮጵያ ባህር ትራንስፖርትና ሎጂስቲክ አገልግሎት ድርጅት እንዲሁም የአገር ውስጥ የማጓጓዝ ወጪን በመሸፈን ትብብር ያደረገዉ የፌዴራል የህግ እና ፍትህ ኢንስቲትዩትን ከልብ እናመሰግናለን፡፡