የፍርድ ቤቶች ዲጅታላይዜሽን እና አዲሱን መመሪያ ከመተግበር አንጻር ያለዉ እንቅስቃሴን የተመለከተ ጉብኝት ተካሄደ

ፌዴራል ፍ/ቤቶችን በራሳቸዉ ኔትወርክ የማስተሳሰር እና አገልግሎቶችን ዲጂታላይዝ ለማድረግ መሰረት ይሆን ዘንድ ላለፉት ዓመታት ፌዴራል ጠቅላይ ፍ/ቤት እያስገነባ የነበረዉ ክላዉድ የመረጃ ቋት ያለዉ እና ደህንነቱ የተረጋገጠ የዋይድ ኤሪያ ኔትወርክ መሰረተ ልማት ዝርጋታ እየተጠናቀቀ ይገኛል።

ይህንን ተከትሎ የለሙትን የተለያዩ መተግበሪያዎችን በአግባቡ ስራ ላይ ማዋል እንዲቻል የፍ/ቤቶች ዲጂታላይዜሽን አሰራርን በተመለከተ በሀገራችን ላሉ ፍ/ቤቶች መነሻ የሚሆን እና የመጀመሪያ የሆነዉ የህግ ማዕቀፍ " የኤሌክትሮኒክ አቤቱታ አቀራረብ እና ሙግት መመሪያ ቁጥር 25/2017" ጸድቋል፡፡

በፌዴራል ፍ/ቤቶች እስካሁን ያሉ የቴክኖሎጂ አጠቃቀም ልምዶች የህግ ማዕቀፍ እንዲኖራቸዉ እና እንዲጠናከሩ እንዲሁም ዘላቂነታቸዉ እንዲረጋገጥ መመሪያዉ ከመስከረም 23/2018 ዓ.ም ጀምሮ እንዲተገበር ዝግጅት እየተደረገ ይገኛል።

በዚሁ መሰረት በቀን 27/12/2017 ዓ.ም የፌደራል ጠቅላይ ፍ/ቤት ምክትል ፕሬዚዳንት ክብርት ወ/ሮ አበባ እምቢአለ በፌዴራል ከፍተኛ ፍ/ቤት አቃቂ ቃሊት ምድብ ችሎት በመገኘት እየተደረገ ያለዉን እንቅስቃሴ እና ዝግጅት በጎበኙበት ወቅት መልካም ጅምሮች እና ዝግጅቶች እንዳሉ ጠቅሰዉ በሁሉም የፌዴራል ፍ/ቤቶች የመመሪያዉ አተገባበር ላይ በየደረጃዉ ባሉ አመራሮች ድጋፍ እና ክትትል ተጠናክሮ እንደሚቀጥል ገልጸዋል።

የፌዴራል ፍ/ቤቶች ተገልጋዮች እና ባለድርሻ አካላትም በመመሪያዉ ላይ ግንዛቤ ወስደዉ ጊዜያቸዉን፣ ዉጣ ዉረድ እና ወጪዎቻቸዉን የሚቀንሱ የዲጂታላይዜሽን አሰራሮችን እንዲጠቀሙ በዚሁ አጋጣሚ እናሳስባለን።