Temesgen Alemayehu
/ Categories: Press Releases

ዜና መግለጫ

የፌዴራል ፍርድ ቤቶች ከነሐሴ 1 ቀን 2015 ዓ.ም ጀምሮ እስከ መስከረም 30/2016 ዓ.ም ድረስ በከፊል ዝግ ይሆናሉ፡፡

የፌዴራል ፍርድ ቤቶች በሕገ መንግስቱ እና በሕግ በተሰጣቸው ስልጣንና ኃላፊነት መሰረት የሚቀርቡ ጉዳዮችን በማስተናገድ የሕግ የበላይነት እንዲሰፍን፣ ሰብአዊና ዲሞክራሲያዊ መብቶች እንዲጠበቁ ሰላም እና ስርዓት እንዲከበር የማድረግ ተግባራትን እየተወጡ ይገኛሉ፡፡

በዚህ መሰረት በ2015 በጀት ዓመት በነበረዉ የመዛግብት አፈጻጻም አንጻር ለፌዴራል ፍርድ ቤቶች በአጠቃላይ 213,116 መዛግብት ቀርበዋል። ከእነዚህም ዉስጥ ለ184,467 (86.56%) መዛግብት እልባት መስጠት የተቻለ ሲሆን 28,675 (13.44%) መዛግብት ደግሞ ወደ 2016 በጀት ዓመት ተሻግረዋል፡፡ የበጀት ዓመቱ አፈጻጸም ካለፈው በጀት ዓመት ተመሳሳይ ወቅት ጋር ሲነጻጸር በ2014 በጀት ዓመት ለፌ/ፍ/ቤቶች የቀረቡት 209,317 መዛግብት ሲሆኑ ዕልባት ያገኙት ደግሞ 176,767 ነበሩ፡፡ በዚህም መሠረት በ2015 በጀት ዓመት የቀረቡት መዛግብት በ2014 በጀት ዓመት ከቀረቡት በ3,799 (1.8%) ከፍ ያሉ ሲሆን በተመሳሳይ ዕልባት ያገኙትም በ7,670 (4.3%) መዛግብት ከፍ ያሉ ናቸው፡፡

የፍርድ ቤቶቹ አፈጻጸም በተናጠል ሲታይ ለፌ/ጠ/ፍ/ቤት በ2015 በጀት ዓመት 26,185 መዛግብት ቀርበው ለ19,201 ዕልባት የተሰጠ ሲሆን 6,984 መዛግብት ወደ 2016 በጀት ዓመት ተሻግረዋል፡፡ በተመሳሳይ በ2015 በጀት ዓመት ለፌደራል ከፍተኛ ፍርድ ቤት የቀረቡት የመዛግብት ብዛት 33,721 ሲሆን 26,301 መዛግብት ዕልባት አግኝተዋል፡፡ ወደ 2016 የተሻገሩት መዛግብት ብዛትም 7,420 ሆኗል፡፡ እንዲሁም ለፌ/መ/ደ/ፍ/ቤት በ2015 በጀት ዓመት የቀረቡት 153,210 መዛግብት ሲሆኑ 138,965 ዕልባት በማግኘታቸው 14,245 ወደ 2016 በጀት ዓመት ተላልፈዋል፡፡

በፌዴራል ፍርድ ቤቶች አዋጁ ቁጥር 1234/2013 አንቀጽ 38 የፌዴራል ፍርድ ቤቶች የስራ ጊዜ  የተደነገገ ሲሆን በዚህም ፍርድ ቤቶቹ ከነሐሴ1 ቀን 2015 ዓ.ም እስከ መስከረም 30 ቀን 2016 ዓ.ም ድረስ ዝግ እንደሚሆኑ እና በዚህ ጊዜ ውስጥ ፍርድ ቤቶች አስቸካይ ጉዳዮች ሊያስተናገዱ እንደሚችሉ ይደነግጋል፡፡ በዚሁ መሰረት የፌዴራል ፍርድ ቤቶች ከነሐሴ 1 ቀን 2015 ዓ.ም ጀምሮ እስከ መስከረም 30 ቀን 2016 ዓ.ም ድረስ በከፊል ዝግ የሚሆኑ ሲሆን ፍርድ ቤቶቹ በዚህ በከፊል ዝግ በሚሆኑበት ጊዜ አሰቸኳይ የሆኑ ጉዳዮችን በተረኛ ችሎት ላይ በሚመደቡ ዳኞች የሚያስተናግዱ ይሆናል፡፡

ይህ እንደተጠበቀ ሆኖ ፍርድ ቤቶች በከፊል ዝግ በሆኑባቸው ቀናት ውስጥ ዳኞች በፈቃደኝነት የበሰሉ የምርመራ መዝገቦችን በመመርመር የተለያዩ የዳኝነት ተግባራትን በተለይም ፍርድ እና ውሳኔዎችን በመሥራት የሚያሳልፉ ይሆናል፡፡ በዚህም ፍርድ ቤቶች ሙሉ በሙሉ በሚከፈቱበት ወቅት በክረምት የዳኞች እረፍት ጊዜያት እልባት የተሰጠባቸዉ መዛግብቶች ከጥቅምት 1 ቀን 2016 ዓ.ም ጀምሮ ለባለጉዳዮች በግልጽ ችሎት የሚገለጹ ይሆናል፡፡

የፌዴራል ፍርድ ቤቶች በ2015 በነበረው አፈጻጻም ላይ ለተገኘው ውጤት ዳኞች፣ የጉባኤ ተሻሚዎች እና የአስተዳደር ሰራተኞች ለነበራቸው ትጋት ምስጋና እያቀረቡ በቀጣይ በ2016 ለሚሰጠው የዳኝነት አግልግሎት በቂ ዝግጅት በማድረግ ፍርድ ቤቶቹ የተጣለባቸውን ሕገ መንግስታዊ እና ሕጋዊ ኃላፊነቶች በላቀ ውጤታማነት ለማከናወን በጋራ እንስራ ለማለት ይወዳሉ፡፡

የፌዴራል ጠቅላይ ፍርድ ቤት

ሐምሌ 27 ቀን 2015 ዓ.ም

Previous Article በፌደራል ዳኞች አስተዳደር ጉባዔ በፌደራል የዳኝነት አካል ዉስጥ ስለሚታዩ የሙስና ተግባራት መከላከያና መቆጣጠሪያ ማስፈጸሚያ ደንብ ስለመደንገጉ የተሰጠ መግለጫ
Print
193