የፌደራል ፍርድ ቤቶች የ2019 በጀት ዓመት መደበኛ የዳኝነት አገልግሎት ማስጀመሪያ መርሃ-ግብር ዛሬ ተከናውኗል። በመርሃ-ግብሩ ላይ የፌደራል ጠቅላይ ፍርድ ቤት ምክትል ፕሬዝዳንት ክብርት ወ/ሮ አበባ እምቢያለ፣ የዳኝነት ሥራ ዘመኑ በሦስቱም የፌደራል ፍርድ ቤቶች በይፋ መጀመሩን አብስረዋል። ምክትል ፕሬዝዳንቷ በመክፈቻ ንግግራቸው፣ ባለፈው የአምስት ዓመት (2014–2018) ስትራቴጂክ ዕቅድ ዘመን ውጤታማ አፈጻጸም የተመዘገበበት እንደነበር ገልጸዋል።

አገራዊ የሕግ ተርጓሚዎች መድረክ በባህር ዳር ከተማ ባካሄደው ልዩ ጉባኤ የኢትዮጵያ ፍርድ ቤቶችን የ2019 - 2021 ዓ.ም የሚመራ የጋራ የትራንስፎርሜሽን ማዕቀፍ አጽድቋል። ማዕቀፉ የፌዴራል፣ የክልልና የከተማ ፍርድ ቤቶች በጋራ ሊያሳኩ በሚችሏቸው የዳኝነት ማሻሻያዎች ላይ የጋራ ርዕይ፣ የተቀናጀ አቅጣጫና በውጤት የሚመራ የአፈጻጸም ሥርዓት ለመፍጠር ያለመ ነው።

በኢትዮጵያ የአውሮፓ ህብረት አምባሳደር ክብርት ሶፊ ፍሮም ኤምስበርገር በዛሬው ዕለት በፌደራል ጠቅላይ ፍርድ ቤት የተሰሩ የዲጂታላይዜሽን ስራዎችን ጎብኝተዋል፡፡ አምባሳደሯ በህብረቱ ድጋፍ የተቋቋሙ ዘመናዊ የችሎት አዳራሾችንና የዲጂታል የመዝገብ አያያዝ ሥርዓቶችን ተመልክተው አድናቆታቸውን ገልጸዋል።

በአውሮፓ ህብረት የገንዘብ ድጋፍ በፌዴራል ጠቅላይ ፍርድ ቤት የአውሮፓ ህብረት ፕሮጀክት ጽሕፈት ቤት አስተባባሪነት፣ በወንጀል ውስጥ ገብተው የተገኙ ሴቶች በዳኝነት ሂደት ውስጥ የሚያጋጥሟቸውን ተጋላጭነቶች ታሳቢ ያደረገ የስርዓተ-ችሎት ማጣቀሻ ሰነድ (Bench book) ላይ የውይይት መድረክ ተካሂዷል፡፡

በፌዴራል ፍርድ ቤቶች የወንጀል ፍትህ አሰጣጥ ሂደት ውስጥ የሚስተዋሉ የሰብአዊ መብቶች ጥበቃ ክፍተቶችን ለመለየት እና የመፍትሔ አቅጣጫዎችን ለማስቀመጥ በተዘጋጀ የዳሰሳ ጥናት (Gap Assessment) ሰነድ ላይ ከባለድርሻ አካላት ጋር የውይይት መድረክ ተካሂዷል፡፡